BARMAPkeyboard_arrow_right夜場資訊keyboard_arrow_right最新吧評keyboard_arrow_rightCP值超高 醫肚首選
 

最新吧評|CP值超高 醫肚首選|JC Cafe & Bar 

十一月
1
星期二
夜場資訊:最新吧評   29

同同事在尖沙咀赫德道開完會,傍晚近6點,大家都肚皮打鼓,唔想煩,諗住求其搵間餐廳醫肚啦,行過JC Cafe &Bar,見到個Menu,立即心心眼-竟然有極罕的港式懷舊小食-手打蝦多士!

蝦多士唔係矜貴菜式,但多士上的蝦膠要手打,製作麻煩,好多廚房大佬都唔願做,所以好少地方有得食,$58可以食到「心機菜」,好吸引呢,見微知著,其他野食應該都唔差,裝修都唔錯,好,就試下你啦。

Happy Hour,我地叫左兩個小食,蝦多士、泰式豬頸肉,另外叫咗兩杯Stella。

蝦多士,炸得好香脆,咬落唔會成口油,證明炸功唔錯,蝦膠薄薄一層,點埋自家製的酸辣醬,相當惹味,送酒一流。

泰式豬頸肉,好多地方有得食,但我敢講,至少7成係濫竽於充,一係太瘦一係太肥,根本只係普通豬肉,至於呢度的豬頸肉,堅,食落有少少油脂但又帶爽,但我覺得個陣醃醬有點似叉燒醬,兼且濃味左少少,如果點泰式秘製醬汁,我覺得over左,另外,如果個醬可以辣番少少會更加惹味。不過口味又真係相當個人化的。

愈食愈起勁,另一個同事又想加入,於是叫多一客Mini Burger,呢個真係-不得了。

好多酒吧都有Mini Burger,但呢度的漢堡特別有肉味,而且有油香、食到牛肉的texture,同少少筋,重點係,唔黐牙,反而增加口感。同經理八下,原來佢地用左美國安格斯牛肉之外,仲將牛扒外圍個層肥膏刴碎,加少少入漢堡,所以食落帶點煙靭。

本來仲想試佢地招牌Home Made Pizza,不過12吋真係食唔哂,唯有留返下次,因為過多一排,酒吧會出半份,即2至3人份量,期待!!

Happy Hour小食的價錢都幾嚇人,尖沙咀水準,深水埗價錢:田園沙律$29,炸薯條$24,卡邦尼意粉$48。飲野都抵,Stella、1664 Blanc一杯$38至48,House Wine一杯$58,仲要buy 1get 1。

埋單一計,又飲又食,3人份只都係$380左右,尖沙咀區,呢個質素,我比80分。

地址
尖沙咀赫德道6號好德商業大廈地舖A號及B號
電話
23013098
營業時間
星期一至六:中午12時至凌晨5時
星期日及公眾假期:下午5時至凌晨5時