咁啱星期六同個朋友係旺角行完街想去酒吧街搵間Bar睇下波啦，行過呢間Max Cafe & Bar 見到入面播緊足球就決定入去啦。

由門口到室內，由天花掛著嘅足球裝飾周圍都係，強烈嘅睇波氣氛一睇就知係球迷聚腳地！原來呢到每逢有球賽直播就會爆晒，除左因為交通方便，最正係呢到有部大熒幕，全場仲有有多個中型熒幕，咁樣就唔洗頭擰擰，坐係邊到都可以睇到。睇到咁上下有啲肚餓，就叫左啲野食野飲，唔好睇佢一間bar仔，原來都好多選擇架，仲好好味架。

Pacific

加左藍色荔枝味利口酒，令Vodka嘅酒精感唔會太重。而且藍藍地，賞心悅目，女仔一定鍾意。

Sexy Cloud

呢杯紅色嘅Cocktail，主要有Cranberry Juice、Rum、桃酒以及蜜瓜味利口酒等混合而成，入口香甜好味。

德國炸豬手

先焗後炸，然後再重複焗炸，令其表皮更香脆，但肉質依然鮮嫩多汁。調味加入胡椒同鹽醃過，非常入味，襯啤酒就非常好。

德國肉腸炸薯角

食飽飯但仲口痕就叫呢個輕量小吃送酒睇波，三款肉腸同大大件薯角嘅小食，香腸烤得惹味，非常香口，用來睇波送酒堅一流！