雞尾酒花款百出，日新月異，依家仲玩到滋潤熱飲。近排天氣轉涼，開始有秋意，夠哂Gimmick。

呢個玩味十足的雞尾酒，係上星期去銅鑼灣耀華街Zerve Bar and Billiards發現的。

咁巔覆？好奇心下，叫咗杯貌似雪梨柚子蜜的Icy Jessy。

熱辣辣上枱，侍應溫提，記得先攪拌。飲落都有少少似柚子蜜，有橙香味，原來用咗橙酒。雪梨係真雪梨，咬落去爽甜，有口感之外，感覺仲幾滋潤。

喉嚨唔舒服，有想叫多杯的衝動呢。

不過另外兩杯都好吸引，兩個女仔Friend叫左，抽下水先。

Passion Fire，唔好比杯上的幾朵玫瑰花呃到，味道唔係咁甜美，反而有陣玫瑰花茶味，帶少少酸甜，睇Menu，原來有蘋果、橙酒成份，兩種味道都幾夾，有新鮮感。

最估佢唔到係Golden Marble，睇落似Latte，面層仲有個好Cute的拉花。入口泡沫Creamy，香濃幼滑，有朱古力味，再飲真D，都幾烈，有白蘭地味，原來用咗VSOP做Base，白蘭地本身味道好搶，但估唔到同朱古力咁夾，而且比朱古力中和後，白蘭地香味更加突出。

前兩杯「熱飲」可能太少女，但呢杯都幾strong，男士都啱飲。

一杯$108，銅鑼灣價錢，OK啦。唔係講笑，雖然只係每杯飲幾啖，但都有D料到，有面紅。

High High地，去玩Social Game。呢度有好多野玩，唔睇波的話，可以篤波，玩Beer Pong。

Zerve好旺場，玩Beer Pong要排隊，我地星期二來，大約等15分鐘就有得玩。值得一提，服務員好Nice，會講解遊戲規則，見我地唔夠人，仲陪我地玩左陣，又傳授秘技，讚！