BARMAPkeyboard_arrow_right夜場資訊keyboard_arrow_right最新吧評keyboard_arrow_right有種Sport Bar叫熱血
 

最新吧評|有種Sport Bar叫熱血|Zerve Plus 

十一月
21
星期一
夜場資訊:最新吧評   31

寫食評,通常都會品評下酒、野食,不過今次我想分享下對Zerve Plus Bartender的睇法。

蒲開銅鑼灣的人,唔會對Zerve Plus陌生,觀感通常都係,格調幾高雅的Sport Bar,有得玩Beer Pong、Slap Cup,打枱波,食物、酒的水準幾有特色咁。

做飲食業,通常怨氣大,但呢度有一兩個Bartender(唔開名,免得人難做),睇得出真係用心做好份工。

有時自己一個人落來,唔玩Game,會坐喺個枱頭飲野睇波,自不然同Bartender吹下水。

有次叫呢度的Signature「爆炸糖」(其實正名係Amazing Journey,因為Cocktail加左爆糖,上台的時候仲爆爆下,所以熟客都簡稱「爆炸糖」),無無聊聊,我問Bartender,呢款雞尾酒都幾得意,點諗出來。 然後,佢就講左一個勵志故事。

簡單來講,就係老闆落柯打,要佢諗一款招牌雞尾酒。因為想設計一款「估你唔到」的雞尾酒,咁佢就由「爆」呢個概念出發。

但點爆呢?係呢個位,佢塞住左,然後佢又諗到雞尾酒好多時會有「抹邊」,通常用鹽、糖、果汁……就咁胡思亂想一輪,橋神終於上身,諗到用爆炸糖做「抹邊」,一來可以做到相同的形態,二來有得爆,有畫面又有口感。

故事未完,Base用咩呢,初頭用威士忌,試到N次,終於搵到啱Feel的Voka,襯返蘋果味,成個Cocktail清新哂。

故事仲未完,呢度另一個Signature Grenade 2.0,前身Grenade 1.0(廢話)只係得依家個Base的3款酒,有日幾個Bartender忽發奇想,一齊研究點樣可以砌高個Tower,玩玩下就砌左個2.0出來,仲好受歡迎添。

你可以話誤打誤撞,但如果少左個份「鍾意」同「玩」的mood,上面兩個故仔,就變成鹹魚的故事。

順帶一提,呢個Tower堪稱攞你命3千,你見佢五顏六色就知係糖衣陷阱,我唔少自命酒筲箕的Friend都死係呢個塔度,個幾支Shooter有啲係甜酒,有啲係硬野,防不勝防,不過其實可以 request bartender嘅,但損友如我,梗係有咁大玩咁大啦。

食物,無故仔分享,但有幾款係值得推介。

Mini Burger係大愛,通常都清一色牛肉,但呢度有3款口味:牛肉、豬肉、羊肉,牛肉係美國牛肉,肉味濃郁,但識得食,一定食羊,非常夠羊味,香而不羶。

Spaghetti Carbonara必食,芝士,全部都係芝士,滋潤啖啖意粉,只覺滿嘴生香,但完全無油膩飽滯。意粉彈牙,有蛋香,唔簡單。

意大利薄餅都推介,傳統做法,薄批,餅底香脆,香腸有鹹香,芝士味恰到好處,無掩蓋其他配菜的味道。

最後想讚下洗手間,除左keep住白雪雪外,仲放左幾個「盆栽」。綠化Concept好Buy,如果是真・植物更好,其實呢度客人多數中產同斯文,應該Keep到的。

酒吧資料
地址
銅鑼灣耀華街38號 Zing! 8樓
電話
56882723
營業時間
星期一至五:下午5時-凌晨4時
星期六:下午7時-凌晨5時
星期日:休息